Getxoko VIII. Komiki Azokak gaur irekiko ditu ateak

BILBO. Getxoko (Bizkaia) Komiki Azokaren zortzigarren edizioa izango da  gaurtik igandera arte. Hiru egunetan zehar Areetako Geltokia plaza  biñetaren munduko topagune bilakatuko da eta bertan, salmenta postuez  gain, hainbat ekitaldi egingo dira. Iaz bezala, aurten ere mangaren  munduak leku propioa izango du Santa Eugenia plazan. Zenbait postu  egongo dira bertan eta ekitaldi anitz izango dira ekialdeko  komikiaren inguruan.

Antolatzaileek adierazi dutenez, guztira, 100 bat saltoki egongo  dira bi lekuetan. Bertan komiki-dendak, liburu-denda espezializatuak,  aldizkariak, fanzineak, argitaletxeak eta bederatzigarren arteari  loturiko zenbait sektore egongo dira.

Bestalde, ohikoa denez, nazioarteko egileak izango dira azokan,  eta hitzaldietan, aurkezpenetan eta sinatze-txandetan parte hartuko  dute. Aurtengo azokan David Lloyd, Dave McKean, Mark Buckingham eta  Paco Roca egileak egongo dira, besteak beste. Halaber, aurten Purita  Campos, "Esther y su mundo" komiki ospetsuaren marrazkilaria, eta  Juan Carlos Eguillor euskal ilustratzailea ere izango dira Getxon,  aurtengo omenaldien protagonistak izango baitira.

Ohikoa denez, erakusketa garrantzitsuak izango dira azokan, eta  zortzigarren ekitaldi honetan egile ospetsuen lanaren inguruko  erakusketak egongo dira. Horrela, Areetako Geltokia plazako karpan  omenaldia jasoko duten artisten atzera begirako erakusketak egongo  dira ikusgai.

Halaber, Paco Rocaren eta Jack Mircalaren lanak egongo dira  ikusgai eta Injuve 2009 Komiki eta Ilustrazio erakusketa eta "Plutón  BRBN.E.RO" telesaioan oinarritutako komikiaren erakusketa ere izango  dira. Azkenik, Euskal Ilustratzaileen Elkarte Profesionalaren eskutik  "El Balanzín" aldizkariaren erakusketa egongo da. Halaber, elkarte  horren egileek beren lanak erakutsiko dituzte Getxoko zenbati  aretoetan.

Argitaletxeen eta egileen nobedadeen aurkezpenak ez dira faltako  azokan, ezta hitzaldi eta mahai-inguruak ere, egunero izango baitira  ekitaldi aretoan, baita emanaldiak ere, asko zikloetan bilduta. Izan  multimediako lanak, izan animazioak, laburmetraiak, dokumentalak edo  animeak, ikusleek komiki munduarekin loturiko zineaz gozatzeko aukera  izango dute.

Azkenik, Manga Guneari dagokionez, jarduera egitarau anitza egongo  da. Bertan, lehiaketak, tailerrak (manga marrazketa eta Japoniako  kaligrafia), mahai-inguruak eta beste ekitaldi asko izango dira  Bizkaiko zenbait manga elkarteren eskutik.