Metroak gaueko trenak ugarituko ditu abenduko datozen bi ostiraletan

BILBAO. Metro Bilbaok zerbitzua hobetzeko urratsak ematen jarraitzen du,  eta hurrengoa aurrerantzean abenduko ostiral batzuetan gau osoko  zerbitzua jartzea izango da, eta aurten, abenduaren 11n eta 18an  metroa zabalik egongo da gau osoan. 100 langile ingururi esker,  geltokiak zabalik egongo dira eta tren bat ibiliko da enborrean  (Etxebarri-San Inazio) 15 minututik behin eta 30 minututik behin  adar
bietan, noranzko bietan.

Zerbitzu honekin egun horietan sortzen den garraio eskaria ase  nahi da, enpresen bilerak eta Gabonetako afariak egiteko egun horiek  hautatu ohi baitira. Guztira, 30.000 pertsonek erabili dezakete  zerbitzu hori, Metro Bilbaoren kalkuluen arabera.

Metropoliko trenbidea ustiatzen duen enpresak "bezeroarentzako  zerbitzua etengabe hobetzeko planari zentzua emango dion urratsa  egingo du". "Une hauetan zerbitzu etengabe gehien ematen duten  Europako metroen artean dago Bilbokoa, eta 2009 amaitzerako 24  orduko

74 zerbitzu eskainiko dira", adierazi dute konpainiatik.

Abenduko bi gau horietako zerbitzua goizaldeko 2:00etatik  6:00etara 32 zirkulazio gehiago sartuz luzatuko da. Trenek neguko  zerbitzuko edozein ostiraletan baino 1.000 kilometro gehiago egingo  dituzte. Ohi bezala, Metro Bilbaok zerbitzu bereziak jartzen ditu  mugikortasun eskari masiboa sortzen duen gertakari publikoren bat  dagoenean. Egun horietan aisialdiko jarduerak areagotzea  erabakigarria izan da gaueko zerbitzua luzatzeko, baita trena  metropolian zehar gero eta hedatuago egotea ere.

Zerbitzua berregokitzeko oraingo ahaleginarekin, gaueko trenek  gaua eta datozen jaiak gozatzera irteten den jendeari garraiabide  seguru eta erosoa eskainiko diete.