Bilboko Udalak espazio berria egokitu du Miribilla auzoan 5-9 eta 10-12 adin tarteetako umeentzat

BILBO. Bilboko Udaletik azaldu dutenez, Miribilla auzo berriak udal zerbitzu hauen erabiltzaile izan daitekeen biztanleria handi samarra du. Horrela, Udal bilbotarrak dituen datuak kontuan hartuta, 5 eta 9 urte arteko seme-alabak dituzten 538 familia eta 10 eta 12 urte artekoak dituzten 271 familia daude.

Haurguneak 48 plaza ditu astelehenetik ostegunera bitarteko txandetarako, eta Kideguneak, berriz, 15 plaza ditu ostiraleetarako. Plaza libreak daude programa bietarako.

Haurguneetan, hezitzaileek umeen heziketa jorratzen dute jolasen eta jostailuen bidez, ikuspegi integral, aktibo eta sortzailearekin, indibidualtasuna errespetatuta eta sozializazioa erraztuta.

Umeak astean bitan joan daitezke, astelehen eta astazekeneko txandan edota asteartea eta ostegunetakoetan. Ordutegia, 17:00etatik 18:30 etarakoa edo 18:30etatik 20:00 etarakoa da. Izena noiznahi eman daiteke plaza libreak dauden artean, urritik ekainera.

Gabonetan programazio berezia izango da, "Gabonetan ere lagunekin" izenekoa, abenduaren 28an, 29an, 30ean eta 31n, hain zuzen, 10:00etatik 13:00etara bitartean. Programazio horretan 5-9 urteko 24 umek hartuko dute parte. Ohiko jarduerez gain, ipuin-kontalarien saio bi ere egongo dira.

Kidegunea, berriz, 10 eta 12 urte arteko neska-mutilentzako espazioa da, eta ostiraletan dago zabalik, arratsaldeko 17:00etatik 19:30era bitartean.

Neska-mutilek aukera dute lagunekin biltzeko eta euren esperientziak trukatzeko. Horretarako, hezitzaileen laguntza izango dute eta, besteak beste, jarduerak proposatuko dizkiete, eta informazioa eta jarraibideak eman. Izena noiznahi eman daiteke urtearen barruan, izan ere urritik ekainera egongo da zabalik.