Ondarroa hasiko da bere Inauteriak ospatzen egitarau zabalarekin

BILBO. Ondarroako Udalak (Bizkaia) eta herriko hainbate elkartek eta  taldek Inauterietako egitarau zabala prestatu dute aurten. Jaia  larunbatean hasiko da, egun horretan Lantzoi Jaunari ongietorria  egingo baitzaio barran, arratsaldeko 20:00etan. Hortik hasita kalez  kale joango da, Artelan taldekoen eskutik, Udal ondarrutarreko  iturriek gaur jakinarazi dutenez.

Igandean antzerki saioa egongo da Kafe Antzokian, eta arratsaldeko  20:00etatik aurrera Lur Zabal eta Kukubiltxok "Mortimer" helduentzako  antzezlana taularatuko dute. Aritza Rodriguez arituko da  eszenatokian, Gorka Zero eta Josu Kamarak zuzendutako pailazo,  musika, akrobaziak eta ezustekoz beteriko lanean. Sarrerak bost  eurotan egongo dira salgai Zurrumurrun eta Kafe Antzokian bertan.

Inauteriko asteartean, otsailaren 16an, herriko umeen  kalejirarekin hasiko da festa, goizeko 11:30etan. Haurrak kalez kale  joango dira mozorrotuta Ibaiondotik Itsasaurre plazara. Ekitaldi hau  Txomin Agirre ikastolak, Zaldupe eskola publikoak, Zubi Zahar  ikastolak eta Ondarroako Udalak antolatu dute. Aurten ezusteko  atseginak egongo dira kalejirako partaideentzat.

Arratsaldeko 18:00etan playback lehiaketa egingo da Kafe  Antzokian, Udalak eta Txirrimorraski ODLT taldeak antolatuta. Bi  mailatan banatuko da norgehiagoka: 11 urte artekoentzat eta 12 eta 16  urte bitartekoentzat. Sariak herriko dendatan erosketak egiteko  txartelak izango dira: 150 euro, 125 euro eta 75 euro 11 urtetik  beherakontzat, eta 200 euro, 150 euro eta 100 euro 12 eta 16 urte  bitartekoentzat.

Ordu erdi beranduago, 18:30etan, lagun arteko futbol partida  jokatuko dute Zaldupe futbol-zelaian Ondarroako Aurrera eta Markinako  Artibai taldeek.

Urtero bezala, jaien amaiera Akuliaren enterruarekin egingo da.  Arratsaldeko 20:30etan hasiko da barran eta, kalez kale ibili eta  gero, sermoia egingo dute Zubi Zaharrean. Azken ekitaldi hau ere  Artelan taldeak antolatu du, Ondarroako Udalarekin batera.