Agerre Teatro taldeak bira bat egingo du "La Celestina"-ren bertsioarekin

BILBO. Agerre Teatroa, lau urte pasa ondoren, bueltan da Kolonbian,  "`Puta vieja alcahueta Celestina!" ikuskizunarekin bira txiki bat  eskaintzeaz gain, Bugako XXIV. Nazioarteko Istorio eta Elezaharren  Topaketan "Herriek beren oroimena gal ez dazaten" deituriko ekimenean  parte hartzeko, konpainiako arduradunek jakinarazi dutenez.

Maite Agirre antzerkigile eta zuzendariak, Ines Martinez de  Ituarte antzezle eta musikariarekin eta Cesar Soto aktore eta mago  guatemalarrarekin batera eskainiko ditu "`Puta vieja alcahueta  Celestina!" lanaren emanaldiak Pastoko Teatro Imperial-ean bihar,  Bugako Teatro Cinema Centro-n asteazkenean eta Popoyaneko Teatro  Guillermo Valencia-n larunbatean. Publikoaren partaidetza  ahalbidetzen duen ikuskizun honek Fernando de Rojas, Feliciando de  Silva eta Arcipreste de Hitaren testuak ditu oinarri, gidoia Maite  Agirrerena dela.

Maite Agirrek, aldi berean, azaroaren 2tik 5era bitartean burutuko  den Bugako XXIV. Nazioarteko Istorio eta Elezaharren Topaketan  "Herriek beren oroimena gal ez dezaten" ekimenean izango da, bertako  kontalari eta artista andana bati ikerketa tailerra eskaintzeko.  Esperientzia honetan landutakoarekin azaroaren 3an Bugako Lia  liburu-dendan jaialdiarentzat propio burututako "La Celestina"-ren  bertsioa antzeztuko dute, agerraldian antzerki teknika eta ahozko  narrazioa fusionatuko dituztela.

Bestalde, Maite Agirre bera zein Ines Martinez de Ituarte  kontalari gisa arituko dira topaketen barne, saioan euskal kopla eta  erromantzeen doinuetatik abiatuz euskal kultur eta oro har  unibertsalak diren elezahar eta mito tradizionaletan murgiltzeko  gonbidapena eginez.