Sormenaren eta esperimentazioaren mugetan arakatzen

PRAKTIKA eta esperimentazioa, jakinmina eta autofikzioa (bizikidetzak) izenburu du Azala kreazio espazioko tailer berriak, baina esaldi luze horren atzean asmo sendo eta garbia daukatela azaldu du Idoia Zabaleta Azala zentroko bultzatzaile eta arduradunak: “Edozein kreazio-prozesutan jakinminarekin esperimentatzea beharrezkoa da”, esan du. Espe Lopez gidari egokia izango da bide horretan murgiltzeko, “praktika eszenikoa ulertzeko irizpide zabala baitauka Espek, etengabe ari da ideia berriak bilatzen edo zaharrak direnak berriro probatzen”, Zabaletak nabarmendu duenez. Autofikzioa ere landuko dute, hau da, “bakoitzak dituen nortasun eta izaera potentzial anitzak lantzeko estrategia”. Praktika eszenikoetan lan egiten duten sortzaileei zuzenduta dago ikastaroa, izan dantzari, antzezle, baita idazle ere, besteak beste. Horrela bada, antzerkiaren inguruan eratuko dute egitaraua, baina kontuan izanda jarduera eszenikoenmugen inguruko esperimentazioa dela lantegiaren ardatza. Erreferentzia literarioak, irudiak, pelikulak eta horren gisakoak ere erabiliko direlakoan dago Zabaleta. Urtarrilaren 3tik 8ra arte batuko dira lantegiko partehartzaileak, Azala zentroak Arabako Lasierra herrian daukan egoitzan, Gasteiztik 21 kilometrora hego-mendebaldean. Gau eta egun elkarrekin biziko dira, “Azalako lantegiak oso intentsoak izaten dira”, dio Zabaletak. Bazkaldu eta lo egin ere, denek batera egingo dute. Gehienez ere, 12 pertsona onartuko dituzte, “kopuru horretako taldeek jasaten dute ondoen hain energia maila altuko ikastaro bat”, Azala zentroan egiaztatu ahal izan dutenez.

Espe Lopez bigarrenez gonbidatu dute Azala espaziora eta Idoia Zabaleta pozarren dago hain eskarmentu handiko gidaria lortu dutelako, “Espe erreferentziazko sortzailea dugu Euskal Herrian, baina ez da erraza haren lana ikusteko aukera izatea”, aipatu du zentroko arduradunak, “iaz ere lantegi trinko bat egin genuen berarekin eta beharrezko ikusten genuen bere ideia, joko nahiz tresnetan sakontzen jarraitzea”. Izan ere, martxan jarritako ideia eta metodoei jarraipena ematea garrantzitsua iruditzen zaie Azalakoei, heziketa prozesuak arrakasta izango badu.

KOREOGRAFIAK ARDATZ GISA Praktika eta esperimentazioa, jakinmina eta autofikzioa (bizikidetzak) ikastaroa Gorputz egoerak izeneko zikloaren barruan dago. Azala eta Krea sorkuntzaguneek elkarlanean abiarazitako programa da hori, “2010ean praktika koreografikoak lantzeko sortu genuen Gorputz egoerak zikloa”, azaldu du Zabaletak. Koreografia izango da, beraz, programaren ardatza, “zentzu zabalenean hartuta, hau da, espazioan eta denboran gorputzek hartzen duten idazteko modu legez”. Hainbat tailer trinko antolatzeko asmoa daukate, baina Zabaletak zalantzak dauzka Kreak egitasmoarekin jarraitzeko borondatea eta gaitasuna izango ote dituen. “Guk, edonola ere, programarekin aurrera egiteko asmoa dugu eta Krearekin ez bada, beste lankide bat bilatu beharko dugu”.

Azala zentroa sorkuntzarako gunetzat har genezake, batez ere dantzaren eta arte eszenikoen ingurukoa, baina bestelako espresio bideak baztertu gabe. Idoia Zabaletak dioenez, “artista, pentsalari eta sortzaileen arteko topaketa eta hartu- emanetarako lekua da”. ArabakoErribera Goitia udalerriko Lasierra herrian duen egoitzan, sormenerako baldintza egokiak eskaini nahi dituzte eta, ikastaro eta egitasmo kulturalez gain, bertan egonaldiak egiteko aukera ematen dute. Baliabide murritzekin eta nahi baino langile gutxiagorekin, proiektu erakargarria atondu dute Azalako arduradunek. “Guregana datorrenari, konpromezu aktiboa eskatzen diogu harreraren truke, jarrera eraikitzailea Azala espazioarekin eta ingurunearekin”, azpimarratu du. Gura duenak, bere webgunean (www.azala.es), lor dezake informazio zehatzagoa