Lekeitio, Ea, Aulesti, Ispaster eta Mendata-Munitibaren ezarriko da errezeta elektronikoa

BILBO. E-Rezeta edo errezeta elektronikoaren hedapenak aurrera darrai  Bizkaian, eta asteazkenetik aurrera, sendagaiak agintzeko sistema  berri hau erabilgarri egongo da Lekeitio, Ea, Aulesti, Ispaster eta  Mendata-Munitibar udalerrietan. Modu honetan, Derio eta Elorriorekin  batera, zazpi izango dira e-rezeta sistema ezarrita izango duten  udalerri bizkaitarrak. Arabako Rivabellosa eta Bastidan eta  Gipuzkoako Oñatin ere ezarrita dago errezeta elektronikoa.

Eusko Jaurlaritzaren arabera, e-rezeta sistema erabiltzen hasiko  diren bost udalerri bizkaitar horietan, guztira, 10.206 lagunek dute  Osasun Txartel Indibiduala. Lekeition osasun zentro bat eta hiru  farmazia-bulego daude; Ean kontsultategi bat eta farmazia-bulego bat;  eta Aulesti, Ispaster eta Mendata-Munitibarren kontsultategi bana eta  botikin bana.

Derion uztailaren 23an abian jarri eta urriaren 21era arte, 29.693  medikamentu banatu eta 12.248 paziente artatu dira sistema berriaren  bidez. Egin diren medikamentu-banaketen %71 gaixotasun kronikoak  tratatzeko eman diren botikei dagokie.

Errezeta elektronikoaren hedapena martxa onean doa, eta jada,  Osasun Txartel Indibiduala duten 31.500 lagun barne hartzen ditu.  Horrela, urriaren 15, 16 eta 17an, lehen aldiz, 1.000 sendagai baino  gehiago agindu ziren sistema horren bidez; zehazki, urriaren 15a izan  zen e-rezeta gehiago agindu zen eguna (1.325 guztira). Bastidan  E-Rezeta martxan jarri denetik, urriaren 18an, 800 medikamentu baino  gehiago agindu dira eguneko (asteburuak salbu).

E-Rezeta medikamentuen erabileran dagoen segurtasuna modu  nabarmenean indartzen duen sistema da. Osasun arloko profesionalen  eta farmazia-bulegoen arteko komunikazioa askoz bizkorragoa da, biek  sarbidea dutelako pazientearen historial farmakoterapeutikora;  horrela banaketako akatsak eta bikoiztasunak ekiditen dira.

Azken horientzat, gainera, tratamenduen jarraipena indartu egiten  da, informazio gehiago baitute; aldi berean, erasotasunean ere  irabazi egiten da, sistema honekin ez baitago zertan osasun-zentrora  joan errezetak berritzera. Aldi berean, aurrerapausoak eman dira  paperezko errezetak guztiz desagerrarazteko prozesuan.

Errezeta elektronikoa gizarte osoari mesede egiten dion sistema  da, baina batik bat gaixo kronikoen kolektiboak jasoko ditu  sistemaren onurak, horiexek baitira medikamentu gehien kontsumitzen  dutenak.

E-Rezetaren lehen hedapen-fasea azaroaren 8an amaituko da,  Hondarribian (Gipuzkoa), eta asmoa da 2012ko amaieratik 2013ko  hasierara bitartean errezeta elektronikoa EAE osora zabaltzea.