Zortzi guneetan dago kokatuta ekipamendua: Botika Zaharra, Zorrotza, Errekalde, Abusu, Casilda Iturriza parkea, Basurtu, Elorrieta eta Lezamako Trenbide Zaharreko Bidean. "Bilboko udal kirolgune hauetan kanpoan jarritako kanastetan jolastea jarduera dibertigarria eta atsegina da, eta atsegina eta probetxugarriagoa da begirale espezializatuekin egiten denean. Izan ere, Bilbon arrakasta duen eta gero eta jende gehiagok jarraitzen duen kirol baten teknikak ikasten dira bertan" adierazi du Jon Sustatxa Bilboko Udaleko Enplegu, Gazteria eta Kirol Saileko zinegotzi ordezkariak, asteburuetan Kirolguneak Dinamizatzeko Programaren aurkezpenean.
Programaren jarduerak igandero egiten dira, urtarriletik ekainera, 11,00etatik 13,00etara, eta 6 eta 18 urte bitarteko haur eta gazteei zuzenduta dago. Doako saio hauen bitartez, saskibaloiaren oinarrizko kontzeptuak era ludikoan eta ez lehiakorrean zabaltzeko asmoa dago.
Helburu honekin, udal kirolgune bakoitzean begirale bat egongo da -bi Casilda Iturriza Parkean, handiagoa baita-, mini-basketean eta saskibaloian jarduteko beharrezko materialarekin. Begirale guztiak Bizkaiko Saskibaloi Elkarteko kolaboratzaileak dira eta kirol-arropa gorri-zuria eta kolore gorriko bisera daramate jantzita.
Aurreko ekitaldietan, jarduera hauek erantzun ona izan dute jendearen aldetik, eta haur eta gazteek parte-hartze ona izan dute programan. Igandero 400 lagun inguruk hartu dute parte saioetan igandero, batez beste.
Botika Zaharrean eta Casilda Iturriza Parkean kokatutako kirolguneetan jende gehiagok hartu du parte orain arte, baina gainerako guneetan gero eta gehiago dira kirol honetan jolas giroan aritzeko biltzen diren gazteak.
