 |
|
|
|
Zirrikituetatik begira
|
|
Imanak eta ispiluak
|
|
Ixiar Rozas
|
|
 |
Esku ezkutu baten eraginez edo, gauza guztiak biderkatu egiten dira Sirakusan. Zuriak diren etxeak, zuriagoak dirudite, higatuagoa ageri da eraikinetako toba eta itsasoak ere indartu egiten du bere urdina joan-etorrietan. Trenez iritsi da ibiltaria, baina berehala hurbildu da penintsula bat osatzen duen eta itsasora begira dagoen hiriko alde zaharrenera. Zurienera. Espaloiaren marra luzeak, etxeen marra okerrak eta irregularrek, eta lehortzear dauden zuhaitzen enborretakoek bat egiten dute bero sargoriarekin.
Arkimedesen ispiluen eraginez izan daiteke, baina Sirakusatik borobila ageri da zeruertza, eskura, haur gineneko mapa mundia eskutan hartzen genuenean bezala. Gauza bera pentsatuko zuten Sirakusako agintariek erromatarren lehenengo erasoak pairatzen hasi zirenean: mundua eskura behar zutela, eta ezin zietela bere portura indarrez sartzen utzi. Horretarako eskatu zuten bertakoa zen Arkimedes fisikariaren laguntza. Lehenengo erasoan, sutan zegoen egurrez betetako zaranak utzi zituzten uretan. Egurren artean iman indartsuak ezkutatu zituzten. Erromatarrek armak altxatu orduko, imanak eta sutan zegoen egurra erakartzen zituzten, eta, ondorioz, su hartu zuen ere erasotzaileen flotak.
Etsaiaren bigarrengo erasoan, Arkimedesek ispilu handiak paratu zituen hiriko harresietan, eta horrek Sirakusako udako beroa biderkatu zuen. Erromatarrak atzera egin behar izan zuten bero jasangaitzarengatik. Alabaina, iritsi zen hirugarrengo erasoa, eta, aldi hartan, Arkimedesek zientzia aukeratu zuen: zientziarako beharrezkoa zen hausnarketa bat burutu behar zuela esan zien Sirakusako agintariei. Hausnarketa ez zela helburu esan zioten hauek, bere helburua hiria salbatzea zela, baina Arkimedesek konpromezua bere buruarekin eta etorkizunerako garrantzitsuak izango ziren kalkuluekin zuela argitu zien. Biharamunean sekulako iskanbila entzun zuen Arkimedesek Sirakusako kaleetan. Lanean jarraitu zuen, ordea, eta halaxe harrapatu zuen erromatar baten ezpatak «zirkuluaren norabidea tenperaturaren baitan dago», esaten ari zela. |
|
|
|
|
|
|
