 |
 |
|
|
 |
Aktorea, zuzendari eta gidoilaria da Aitzpea Goenaga. Balledor |
|
| MÁS INFORMACIÓN |
|
|
|
|
|
|
«Miarritzeko FIPA tranpolin izugarria da filmarentzat»
|
|
Aitzpea Goenaga Zuzendari eta gidoilaria
|
|
|
Nagore Ferreira Zamalloa Bilbo
|
|
Bernardo Atxagaren ‘‘Zeru horiek’’ nobelan oinarrituta dago pelikula. Liburua batez ere barne gogoetez osatua dago, nola moldatu duzu ikus-entzunezko lengoaiara?
Ez da izan pelikula erraza, ez da izan erraza pantailaratzeko. Protagonistaren gogoetak agertzen dira behin eta berriz, eta barruko pentsamendu horiek geldoak dira. Hori ez da batere zinematografikoa, pertsona bat pentsatzen ikusteak ez du indar bisualik. Pelikula muntatzerakoan batez ere indarra hartu duena izan da protagonistak besteekiko duen harremanak eta baita flash-backek ere. Alde literarioa, bere gogoeta literarioak, muntatzerakoan lehenbizi erori diren zatiak izan dira.
Emaitzarekin gustura zaude?
Oso pozik nago emaitzarekin. Kontziente naiz errodatu dudala zinea izango balitz bezala, baina telebistako denboran. 18 egunetan errodatu genuen. Baina planteamenduari dagokionez, zinerako bezala izan da. Telebistarako pelikulek oso lokalizazio gutxi izaten dituzte, baina honek asko izan ditu. Bartzelonan mugitu gara, Donostian ere... Nahiko eromena izan da planifikazio handia eskatzen duelako, baita lan izugarria ere.
Nagore Aranburu aktoreak joka-tzen du protagonistaren papera, zer dela eta aukeratu zenuen?
Zorte handia izan dut Nagore Aranbururekin. Hasiera-hasieratik oso garbi neukan bera izan behar zela protagonista. Pertsonaiari gauza asko ematen dio berak, baina batez ere indarra. Bera da pelikulako %98, bera dago pelikula osoan. Oso pozik nago bere lanarekin, baita talde guztiarenarekin ere. Benetan nago harrituta nolako gogoarekin egin duten lana.
Euskaraz errodatu duzue, eta Miarritzen ere euskaraz emango dute, ezta?
Bai, jatorrizko hizkuntzan eskainiko dute, azpitituluekin. Nik argi neukan pelikulak euskaraz izan behar zuela, pertsonaiak, bere ideiak, bere pentsamenduak, euskaraz adierazten ditu eta horrela nahi nuen kontatu.
FIPAra heltzea oso garrantzitsua da filmarentzat, merkatua ere badelako jaialdia.
FIPAra iristea tranpolin izugarria da. Salduko balitz... Lehengo egunean kazetari frantziar batek galdetu zidan ea nahiko nukeen ‘‘Zeru horiek’’ telebista frantziarrak erostea. Saltoka hasiko nintzatekeela erantzun nion. Hori amets bat izango litzateke. Ahalik eta gehien zabaltzea nahiko nuke.
Euskal Herrian zein Frantzian, zein beste edozein lekutan ikusteko moduko pelikula dela pentsatzen duzu?
Niri iruditzen zait gai oso unibertsala dela. Hemen kokatzeak ematen dio dramatismo handiagoa, baina pentsatzen dut beste edozein tokitan berdin-berdin uler daitekela. Eboluzio baten historia da, bidaia baten historia. Badago aldaketa bat paisaian, pertsonaiarengan aldaketa bat dagoen modu berean. Gauzak beste ikuxspuntu batetik ikustearen inguruko hausnarketa bat dago. Denok bizitzen ditugu horrelako egoerak, bai hemen, bai Frantzian, bai Txinan ere. Bakoitzak egingo du bere interpretazioa, bere irakurketa.
Euskaraz errodatu duzu lana, euskaraz pantailaratuko da, baina bertako diru barik gauzatu duzue.
TVEk ekoiztu du, TV3ekin batera. Ekoizle nagusia TVE izan da. Bitxia da, bai, euskaraz errodatu da eta ez dago Euskal Herriko dirurik, zentimorik ere ez. Oso gustura egin dut lan, oso babestua sentitu izan naiz. Benetan harritu nau, ez nago ohituta.
Hilabete gutxian, ‘‘Aupa Etxebeste!’’, ‘‘Zeru horiek’’ eta ‘‘Kutsidazu bidea, Ixabel’’ filmak ekoiztu dira. Zerbait mugitzen denaren seinale?
Zenbat esan dizkidazu?
Hiru, bata zeuk zuzendua.
Pentsatzen nuen gehiago esan behar zenituela... Hiru, bai, ez dago besterik. Negargarria iruditzen zait pentsatzea hau asko dela esatea. Galdetzen didazuen guztiei erantzuten dizuet negargarria dela. Negargarria da 15 urte eta gero horrela egotea. Lehen bazegoen zine produkzio bat Euskal Herrian, tekniko ikaragarriak sortu ziren hemen, baina hil egin zen, hil egin zuten zine produkzio hori. Gaur egun, telebistek, Europako legearen arabera, beraien aurrekontuen %5 eman behar diote zine produkzioari.
Jakina, gurean ez da horrelakorik betetzen...
Ez, ez da betetzen, eta inork ez du ezer egiten bete dadin. ETBk ez du %5 hori ez eta urrutitik ere batetzen. Hiru produkzio egin dira, hori oso gutxi da. Eta ‘‘Zeru horiek’’en ez da euskal dirurik egon, beraz... Oso grabea iruditzen zait hau ondo dagoela esatea. Askoz gehiago egin behar da.
Zenbat lan egin beharko lirateke, zure ustez, sektorea osasuntsu dagoela erakusteko?
Nik nahiko nuke %5 horretan sartzea, eta normala bihurtzea 8-9 produkzio egitea urtean. Ez da hainbeste. Telebistarako ordu asko dira horiek, gainera merkatuetan sal daitezke. Ez diogu frakasoari beldurrik izan behar. Gauza onak eta gauza txarrak egon behar dira, gauza handiak eta gauza txikiak. Apustuak egin behar dira, zalantzarik gabe. Kontua da harria mugitzen izatea, mugitzearekin egingo dira gauzak, mota guztietako gauzak. Okerrena ezereza da, mugimendurik ez egotea, zeren horrek dagoena ere hiltzen du. |
|
|
|
|
|
|
