 |
 |
|
|
 |
"Kuadrillategi" egitasmoko arduradunak. Urremendi |
|
|
|
Bermeoko Udalak "Kuadrillategi" egitasmoa jarri du abian aurten
|
|
Proiektuaren helburua gazteen aisialdiarekin batera euskararen erabilera bultzatzea da
|
|
|
Imanol Fradua Bermeo
|
|
Bermeoko Udalaren Euskara Sailak oraintsu hasi den ikasturterako 12 eta 14 urte bitarteko herriko gazteei zuzendutako "Kuadrillategi" deritzon egitasmo berria martxan jarriko du urrian. Ekimen berezi honek tailerrak, ikastaroak edota jaiak antolatzearekin batera, udalerriko gazteen aisialdian euskararen erabilera bultzatzea du helburu nagusi moduan.
Datorren urriaren 7an hasiko da koadrilan euskaraz bizitzeko proiektua eta herriko Gaztelekuan burutuko da larunbat goizero, batez ere. Arduradunek parte hartzeko jarri duten baldintza bakarra gazteak bertan dauden bitartean euskaraz hitz egitea da, hizkuntza lantzea. 12 eta 14 urteko gazteek berriz, GIZen (Gazte Informazio Zerbitzua) egoitzan eta Gaztelekuan eman beharko dute izena, egitasmo berria hasten den egunaren bezpera arte.
«Apustu handia»
"Kuadrillategi" egitasmoa Bermeoko Udalak, eta batez ere Euskara Sailak, gazteen artean euskararen erabilera bultzatzeko duen «apustu handiaren baitan» finkatzen da. Herriko "Gazte Plana" delakoaren babes osoa izanik, helbururik nabarmenena «gaztetxoen hizkuntza ohitura euskararen alde aldatzea da», Maite Ortiz de Zarate Euskara teknikariak adierazi zuen moduan.
«Berritasun nagusia gaztetxoen kuadrilen artean euskararen erabilera sustatzea izango da» Ortiz de Zarateren esanetan, «baldintza bakarra euskaraz hiztegitea izango delarik gaztetxoen hizkuntza ohiturak lantzeko, eta ahal den heinean, geurera erakartzeko».
Egitasmoa udalerriko ikastetxeetan matrikulatuta dauden DBH 1 eta DBH 2 mailetako ikasle guztiei aurkeztu zaie egunotan, eta asmoa urriaren 7tik aurrera larunbatero gazteen kuadrilak Gaztelekuaren inguruan batzea da, jokoak, tailerrak, jaiak edota irteerak bezalako ekintzak antolatuz eta bertara erakarriz.
Bizkaian, lehen aldiz
Antolatuko diren ekintzak gazteen gustuen arabera burutuko dira arduradunen esanetan, eta hiru hilerik behin "Kuadrillategi" egitasmoa martxan duten beste herri batzuetara egingo dira irtenaldiak. Bermeon izango den egitasmoa Bizkaian martxan jarri den lehenengo proiektua da -Arrigorriagan esperientzia berbera bi asteren buruan egingo dute-, izatez orain arte Gipuzkoa eta Nafarroan «emaitza onarekin» egin badira ere. Udaleko bozeramaileen esanetan berriz, egitasmoak bi bide jorratzen lagunduko du. «Alde batetik euskaraz bizitzeko ohitura areagotu nahi da; eta bestetik berriz, etorkizunean gure hizkuntza lantzea ere bilatzen dugu», Juan Karlos Goienetxea alkatearen esanetan.
Oraindik ekimenen egutegia finkatu ez bada ere, Bermeoko "Kuadrillategi" proiektuan larunbat goizero lanean izango diren hiru jagoleek «gaztetxoen gustuko ekintzak» bideratuko dituztela adierazi zuten. |
|
|
|
|
|
|
