Gauza jakina da: Euskal Herrian, baita, noski, EAEn, euskara arrotza da. UVIan oraindik ez, baina, urruti ere ez da ibiliko. Nola azaldu bestela berau sustatzeko gero eta ohikoagoak diren kanpainak? Futbolak, adibidez, ez du zale gehiago erakar-tzeko horrelako ekimenen beharrik; ez eta gaztelerak Espainian erabilera sustatzeko ere.
Azken Inkesta Soziolinguistikoaren arabera (2001. urteari dagokiona), milioitik gora erdal elebakar daude Autonomia Erkidegoa osatzen duten hiru lurraldeetan; milioi erdi gehiago dira Nafarroako eta Iparraldeko datuak gaineratzen bazaizkio. Euskal Herria erdalduna da euskalduna baino. Erdaldunek dute lehenengo hitza. Eta azkenekoa...
Guzti horiei, erdaldunei, bai eta nahiz eta elebidunak izan berba egiterako orduan elebakarrak direnei, zuzuzendutako kanpaina jarri du abian Eusko Jaurlaritzako Hizkuntza Politikarako Sailburuordetzak. Asmoa EAEko bi hizkuntza ofizialen arteko elkarbizitza sustatzea da; hizkuntzak bata bestearen etsaiak ez direla azpimarratzea, gizarteratzea.
Datorren abenduaren 3an ospatuko den Euskararen Nazioarteko Egunarekin egingo du bat kanpainaren bukaerak, Donostian izango den ekitaldiarekin. Bertan egongo da Juan Jose Ibarretxe lehendakaria bera, «originaltasuna eta ikusgarritasuna» uztartuko dituen ospakizunean. Kanpaina informatiboa, komunikabideen bidez zabalduko dena, alegia, izango bada ere, amaiera ekitaldiaz gain beste bi ekimen antolatu dituzten abenduan sartzearekin batea. Horrela, abenduaren lehenengoan kontzertu bat izango da Bilboko La Casilla kiroldegian. Egun bat geroago, Gasteizko hiriak haurrei eta gurasoei zuzendutako herri bazkaria hartuko du.
"Kutsatu! Ekin, ukan, ekin" lelopean abiatu den kanpainak birus baten itxura hartu du; elkarbizitzaren birusa. Metafora zalditzat hartuta bidea egiten hasi den Jaurlaritzaren ekimenak hizkuntzen arteko elkarbizitza bultzatu gura du. "Ukan" birusa da, hain zuzen ere, elkarbizitza horretan, konplexurik eta aurreiritzirik gabe barnera-tzea ahalbidetzen duena.
Pedro Miguel Etxenike zien-tzialaria, EHUko errektore Juan Ignacio Perez, Adelaida Umaran Mikrobiologian Doktorea eta Gorka Landaburu kazetaria eman zuten atzo birusaren "aurkikuntzaren" berri.
Birusarekiko kutsaezinak
Sarako laborategian egindako aurkikuntza da "Ukan" birusarena. Ezaugarri ugari ditu. Denak onak. Birusetan ohikoa ez dena. Lau ezaugarri nagusi ditu: oso moldakorra denez, etengabe egokitzen da suertatzen zaion giro eta bizi baldintzetara; era berean, eraginkortasun handikoa da, izan ere, kutsatutakoak oso denbora gutxian antzematen du haren eragina; guztiz kutsagarria da, eta ez da haren kontrako sendabiderik ezagutzen; azkenik, pertsona multzo bakarra aurkitu dute zientzialariek birusarekiko kutsaezinak; munduko hizkuntzak gutxiagotzea mesedegarri eta hizkuntzen balioa hiztunen kopuru soilaren baitan ikusten dutenek osatutakoa.
Era berean, elkarbizitzak komunikazioa eta gizarte sinergia errazten dituztela azpimarratu zuten atzoko lau protagonistek, bai eta egoera diglosikoak saiestu ere, euskaraz bizitzea erabaki dutenen aldeko ekimenak bideratuz. |
