 |
|
|
|
Zorionak aizu!
|
|
|
Asier Amondo
|
|
Autorea AEK-k kaleratzen duen "Aizu" aldizkariaren inguruan mintzo da, 25 urte betetzen baititu. Euskararen normalkuntza prozesuan bere ekarpena egin du
|
|
Zorionak AIZU! 25 urte bete dituzulako. Zorionak 25 urte euskal prentsa idatzian ez direlako hain erraz betetzen eta zuk baino urte gehiago duen aldizkari gutxi dagoelako.
Orain 25 urte Euskal Herriko AEK-k euskaldunei eta euskara ikasleei euskarri bat eman nahi izan zigun gure aisia eta informazioa euskaraz goza genezan.
Gure irakur zaletasuna euskaraz gara genezan eta hizkuntz ohiturak alda genitzan.
Euskarak, AIZU!-k eman dizkion moduko egun asko behar ditu bere egoera beste edozein hizkuntzaren egoerarekin parekatua izan arte; onarpena, prestigioa, egoera normaldua, euskal herritarren komunikazio tresna, hezkuntzan erabat txertatua, administrazioan, enpresa pribatuetan,…
25 urte eta gero AIZU!-k normalkuntza prozesu horri bere ekarpena egin dio euskal prentsan bere toki propioa duen aldizkaria izanik.
AIZU! Euskal Herriko AEK-k sustatuko aldizkaria da, ikasleentzat egindako produktua, euskara errazean idatzitakoa eta irakasleentzat ere lagungarri gertatzen dena klaseak prestatzeko orduan. Azken urte hauetan AIZU!-k heldutasuna lortu du. Heldutasun hori ospatu beharrekoa da azken 25 urte hauetan ez baitu hutsik egin irakurleekin duen hitzordura.
Dagoeneko argitaratu diren hirurehun eta hamaika ale horietan milaka lagunek jarri diote aurpegia aldizkariari. Ehunka kolaboratzaile izan dira; kolaboratzaileak, erredaktoreak, argazkilariak… 25 urte hauetako emaitzaren meritua zuena ere bada hilero esku artean AIZU! izateko aukera bermatu diguzuelako.
Azkenik, zera aipatu nahi dizuegu irakurle, sponsor, kolaboratzaile, erredaktore, argazkilari izan zareten eta zareten guztioi: AEK-k orain arteko konpromisoari helduko diola eta, zuek AIZU! kioskoetan, euskaltegietan eta etxeetan egotea bermatu duzuen bezala, AIZU!-ri beste hain beste urte oparo bermatu gura dizkiogula, erabateko normalkuntzaren bidean eragiteko.
Asier Amondo, AEKren Artezkaritza Kontseiluko kidea |
|
|
|
|
|
|
