 |
|
|
|
Zirrikituetatik begira
|
|
Akordioak
|
|
Erramun Osa
|
|
 |
Hauteskundeen atarian gaudelarik, hainbat alderdik eta sindikatuk 2004. urtean izenpetutako Akordio Soziopolitikoaren altzora, udaletan euskararen aldeko hizkuntza politika bizkortzeko ustez eredugarriak diren ordenantzak aurkeztu dituzte. Ustez diot, ezen, aipatu akordio horretan alderdi nagusiak ez baitaude, beraz, aurkeztutakoaren eragingarritasuna oso mugatua izango dela aurresatea ez da inolaz ere astakeria. Ez daudenak haien borondatez ez daudela esateko, haien euskaltzaletasuna zalantzan jartzeko edota gure hizkuntzaren kontrakoak direla baieztatzeko abaguneaz baliatuko denik egongo da bazterretan. Kontua, ostera, bestelakoa da.
Euskara indarberritzea bilatzen duen ezein akordiok askotarikoen arteko adostasunak bilatzea, ehuntzea behar-beharrezkoa du, nik uste. Hortik apartekoak ibilbide laburreko estrategiak, protagonismo antzuak barne direla, elikatzea beste xederik ez du. Izan ere, Euskal Herriaz hainbatetan hitz egiten dugularik, gure herriaren errealitatea, hala politikoki nola sozialki, askotarikoa dela ahazten dugu. Ataunen gara dezakegun hizkuntza politika garatzeko gizarte baldintzak ez daude Bilbon. Orexarako aproposak izan litezkeen oinarriak Barakaldon aurrera egiteko gutxienekotzat hartzea beste planeta batean bizitzea bezala da. Alabaina, Donostian egin litekeen hizkuntza politika baino harago joan daiteke Ondarroan. Lekuan lekuko errealitateen araberako trajea, adostasunak gorpuztean dago arrakasta lortzeko ezinbesteko giltza.
Taldean joan nahi duen mendizale talde bati buruz jardutean, erritmorik makalena ezartzen duenaren arabera jardun beharra dagoela azpimarratzen dugu beti mendizaleok, horixe baita gailurrera, nekezago, berantago, beharbada, taldean iristeko ezinbesteko baldintza. Horrek, nola ez, beste baldintza batzuk biltzen dituztenekin zaudenean bestelako abiadarik eraman ezin duzula ez du adierazi nahi. Horiek horrela, taldean joan nahi dugun argitzea da une honetako kontua, gutxi batzuek indarra duten edota gobernatzen duten erakundeetan bete-tzeko ez gauza diren kontuez hitz egitea bainoago, itxurakerietatik harago. |
|
|
|
|
|
|
