Txinan zabalduta dagoen euskal etxea ere atxikitu zaio Korrikari martxoaren 24ean Korrika TX1-i hasiera eman zitzaiolarik Pekingo Tian An Men plazan. Hitzordu berezi horretan metroa hartzeko baimena dute eta etenaldiak egiten dira, Euskal Herrikoan jazotzen ez den bezala. Hori bai, euskal ohiturak jarraituz, bazkari batek batuko ditu mahai batean euskaltzale guztiak.
Hala ere, Euskal Herriakoaren pare, parte hartu dutenei 100rmb-ko eskaera bat egin zaie, sortzen diren gastuak ordaintzearren. Gainera mus txapelketa bat ere antolatu dute. Hamar bikotek gezurrak esateko prest elkartu ziren eta azkenik Mikel Aiestaran eta Jokin Laspiur gipuzkoarrak izan ziren garaile, Juango Colas eta Yago Leon bigarren geratuz.
Gaur, Iparralden
Korrikak Nafarroako hainbat eskualde zeharkatu zituen atzo uholdeen beldurrik gabe. Zirimiria izan zen leku askotan, baina euri gutxiago egin zuen behintzat, eta atzo iluntzean Lizarra aldeko jendea kezkatuta bazebilen ere, Arga ibaia azkenean ez zen bere bidetik atera eta bertakoek pozik hartu zuten Korrika herrian. Hala ere, eguna beste bi protagonista nabarmenekin hasi zuen Korrikak: Ziordiko bi mutil gazte beren herria eta Mugiro artean Korrikak egin zituen 50 kilometro baino gehiago aritu ziren lasterka ikurrina bana hartuta. Lizarran ume piloa ibili zen korrika, baina azpimarratzekoa da poligonotik hurbil pasatzean batu zen langile kopurua ere. Lizarran bertan, euskaltegiko hiru ikasle emakumek eraman zuten lekukoa. Eguerdi aldera Korrika berriro sartu zen Arabako lurretan eta han ere ume askok egin zioten harrera. Nafarroatik Arabarako bueltan, zati horretako lehenengo kilometro arabarra, emakume baten eskuetan egin zuen lekukoak: Mertxe Garcia de Azilu.
Kanpezun euskararen transmisioaren beste irudi bat ikusi ahal izan zen, gizonezkoek protagonizatua, azken kilometroa Urkok, Asierrek eta Aitorrek egin baitzuten, alegia, mutikoak, aitak eta osabak. Ez da parte hartu duten lehen aldia izan, familia horrek dagoeneko ohitura baitu kilometro bat erosteko.
Iluntzean itzuli zen Korrika berriro Nafarroara, erabateko jai giroan. Horren erakusle dira Mendabian mozorrotuta ibili ziren gazteak eta Lodosan karrera iritsi bitartean egindako jaia, jota eta guzti. Nafarren artean ibiliko da gaur arratsaldera arte. Gero Iparraldera joango da. |
