 |
|
|
|
Zirrikituetatik begira
|
|
Planak egiten
|
|
Yolanda Arrieta
|
|
 |
Opor usainez dator hil amaiera. Aste Santua kolore gorriz jantzi da egutegi guztietan. Hotelak plen, eski estazioak gainezka... Irteera-operazioez beteko dira aurki albistegiak. Autoz, karabanaz eta hasperen aspertuez, errepideak. Udaberriko atseden egunak iritsi dira dagoeneko, eta nora goazen galdezka hasita daude auzoan.
Hil berriarekin helduko da Haur Liburuaren Nazioarteko Eguna ere. Apirilaren 2an ospatzen da ospatu nahi den leku guztietan; Nazioarteko Eguna izateak ez duelako ezer bermatzen. Asko jota, gogorarazi.
Ez naiz ez, egun triunfalista bakar zalea. Letrak, kontuak, ilusioa, utopia edota xarma bezalako kontzeptuak egunez egun jorratu beharra dago, antzina apirila izenez ezagutzen dugun hilabetean lurrarekin egiten zen legez. Hortik jorraila, jorratzeko hila. Gaur, zapatu soil, korronte eta normal bat dugu aurrean, eta denetarik egindezakegu, goizetik gauera bitartean. Hala denez gero, gonbidapen bat egin nahi nizueke, opor giroa eta haur- kondairei erreparatzeko eguna atarian direlarik.
Gera zaitezte denok ohean, goxo-goxo, kontu-kontari, izan liburu batekin, izan ahotsaren doinupean. Murgildu zeuen ondokoekin denborarik gabeko paraje ezezagun horietan, eta disfrutatu hango balizko usainekin, gustuekin, koloreekin, pertsonaiekin... Itzultzean, gera zaitezte apur bat gehiago sabaira edo leihora begira, eta, ondoren, prestatu zeuen gustuko janaria. Dasta ezazue bihar beste ezer ez balego moduan.. Bazkal ostean, eguraldi txarra bada, zoazte zinera zeuen seme-alabekin, eta ikusi adibidez, Un puente hacia Terabithia izeneko filma. Konturatuko zarete nola istorio onek liburutik pantailara eta pantailatik bihotzera salto egin dezaketen.
Gaur ondo pasatzen baduzue, errepikatu bihar gaurko plana; ziur egon, ezberdin aterako dela-eta.
Eta ez izan beldurrik adikzioa sortzen badizue.
Bihotzak eskertuko dizue. Eta, zer esanik ez, zeuen inguru hurbilak. |
|
|
|
|
|
|
