 |
|
|
|
Zirrikituetatik begira
|
|
Itxuraz gai
|
|
Xabi Larrañaga
|
|
 |
Azucena Abantoko modelo bat da. 24 urte ditu eta Barakaldon izandako lehiaketan Euskadiko Mejor Cuerpo Fitness First aukeratu dute. 88-61-90 zenbakiak ez ditu alferrik ezkuta-tzeko, eta gorputza gisa horretako azoketan erakusteko gogorik badu ez diogu eskubidea kenduko. Bilboko gauean bi adituk -lan zaila, bai, adituona- ezagutu zuten eta luze gabe moda munduan sartzeko gonbitea egin zioten. Eta hark zalantzak zalantza onartu.
Ez ziren, ordea, aditu bakarrak izan, herriko sozialistek ere goiz erreparatu baitzieten neurri haiei. Ez zuten Azucenaren ikasketen berririk, eta gehiago zekiten haren ipurdiaz haren ideologiaz baino. Eta hala ere edo, hobeto esanda, hain zuzen horrexegatik joan ziren harengana, ederra eta liraina zelako, dotore eta fina zelako, neska katxarroa zelako.
Hura kalean gora eta behera zihoala haiek ere tortikoliak jotzen zituen. Udal zerrendan azaltzea eskaini zioten opari edo, berriro hobeto esango dugu, mesedez agertzeko eskatu zioten, eta modeloak orduan poz-pozik baietz erantzun. Orain kultur zinegotzia izan nahi du. Bejondeizula, guapa.
Harrigarria da politikan eskarmenturik gabeko pertsona era horretan promozionatzea. Egunkari eta telebista guztietan ikusi dugu, eta arrosak alderdiko buruzagi gorenekin banatu ditu Bizkaiko hiriburuan, auzokorik ez duen lekuan baina begiak ez ezik botoak ere erakartzen.
Ez dut ezer Abantoren aurka, eta ziuraski bertako sozialisten zerrendan laugarren postuan izatea oso harro egoteko arrazoia da. Nago, berriz, neska arrunta izango balitz ez lioketela ez eskaintza ez eskaerarik egingo, eta arrunt itsusia izanez gero ez luketela hara-honaka eramango, apaingarri, lotsagarri. Feminismo gaurkotua, nonbait. |
|
|
|
|
|
|
