 |
|
|
|
Zirrikituetatik begira
|
|
San Frantzisko (X)
|
|
Julen Gabiria
|
|
 |
Ehunka apunte ditut koaderno beltzean pilatuta. Ez du batak bestearekin zerikusirik, ez bada auzo honetan ikusi, entzun, usaindu edo sumatutakoak direla denak. Kaletik paseatu, begiak zabaldu eta barrura heltzen zaidan hori apuntatzea da kontua. Gero, atseden hartzen uzten diet ohar horiei, eta noizean behin bisita egiten diet berriro, zer moduz galdetzera eta ea istoriotxoren bat oparituko didaten jakitera.
Baina apunte laburrak dira, erabat, ezdeusak ezer sendoagoa sor-tzeko. Bururatzen zaidan gauza sendo bakarra auzoaren inbentarioa egitea da. Baina Georges Perecek beste inork baino hobeto egin zuen hori duela hogeita hamar urtetik gora (hain zuzen ere, horregatik egin zuen hobeto; horregatik, eta inor baino jenialagoa zelako, bide batez esanda), "Gauza asko daude Saint-Sulpice plazan" esaldiarekin hasten zen testu gogoangarri hartan.
Apunte solte horiei begira, tentazioa izaten dut nik neuk ere lan amaiezin horri ekiteko, kontaduria hutsaren asmoarekin. Izkina batean paratuko nintzateke, koadernoa esku artean hartuta, eta apuntatuko nuke Benny "Kid" Paret boxeolariaz etengabe min-tzatzen den zaharra, "loreak, tristura" esaten duen ume enigmatikoa, kotxe barruan lo egiten duen gizon txandalduna, polizia komikiak irakurtzen ezkutuan, jonkiak zapatila zuriekin, pasta-denda arabiarreko bezero eternalak, Arte Ederretako ikasle bat pastazko betaurrekoekin eta jaka luzearekin, eta bata jantzita kalera ateratzen den emakumea.
Bilboko leku bat agortzeko ahalegin honetan, konturatzen naiz ze ondo ematen duen jende klase honek hemen eta ez beste inon. Heriotzak hondartzako bainujan-tzien artean ondo ematen ez duen bezala. |
|
|
|
|
|
|
