 |
|
|
|
Zirrikituetatik begira
|
|
Banoa
|
|
Jasone Osoro
|
|
 |
lekuz aldatzen naute. Berriz ere. Manikia izateko gizaki askok baino dezente gehiago bidaiatu dudala esango nuke. Eskaparatez eskaparate izan da orain arte. Aitortzen dut ikuspegi mugatua izan dudala, enkuadre bakarrekoa. Baina, halere, gehienok uste duzuena baino gehiago ikus daiteke leiho txiki honetatik. Azken batean, ikusteko gogoa izatea da inportanteena. Entzuteko gogoa bezala, hitz egiteko gogoa bezain inportantea. Ezertarako gogorik ez duenak ez dago bizirik, denborak ihes egiten dio zirrikitu guztietatik eta sentsazioa dauka bizitza aspergarria dela, egun guztiak bertsuak direla. Aldiz, ohean etzanda egon arren, leiho txikitxoenetatik begiratzeko gai denak eta begiratzen duenak, bere begien aurrean dozenaka, ehunka gauza gertatzen direla ikusi ahal izango du. Bi jarrera daude bizitzan: aktiboa eta pasiboa. Eta aktiboak dira gehien gozatzen dutenak, gehien sufritzen dutenak eta hizki maiuskulekin bizi direnak. Horregatik diot nire erakusleihoetatik ikusi izan dudan bizitza erraldoia izan dela beti, matizez betea, kolore anitzez margotua, usain gozoz lurrindua. Eta horiexek izan dira kontatu dizkizuedanak.
Orain banoa. Eskaparatez aldatuko naute. Edo ez. Egia esan, oraingo honetan emakume xelebre batek hartu nau besoetan eta Cadillac deskapotagarri gorri ikusgarri batean sartu nau. Bidaia luzea egiteko asmoa duela uste dut eta bakarrik joan baino nahiago omen du konpainian. Nahiz eta konpainia hori maniki batena izan. Ni neu. Greta. Batek daki zer-nolako pasadizoen lekuko izango naizen deskapotagarri honen barruan eserita. Auskalo zer biziko dudan emakume bitxi honen aldamenean. Akaso izango dugu aukera aurrerago berriz ere elkartu eta horiek denak kontatzeko. Akaso. Bien bitartean, bidaia ona izan dezazuela eta begiratu, entzun, hitz egin, sentitu. Enkoadrea baino inportanteagoa da jarrera. Ez ahaztu. Plazera izan da sei hilabeteotan zuen begi bihurtzea. Muxuak. |
|
|
|
|
|
|
