 |
|
|
|
Euskara taldeek dirulaguntzak eskatzeko beta dute ondarroan
|
|
Urriaren 19ra bitartean izango da zabalik aurtengo laguntzen bigarren deialdia.
|
ondarroa. Ondarroako Udalak euskara sustatzea helburu duten herriko taldeei dei egin die urriaren 19a baino lehen 2007ko bigarren dirulaguntzak jasotzeko eskaria egin dezaten. Norgehiagoka erregimenean emango diren laguntzak egoitza edo jarduketa-eremua Ondarroan duten pertsona eta irabazi asmorik gabeko erakundeei zuzenduta dago, euskara ondorengoetaratzea, euskararen erabilera edo kalitatea lan esparru izanik.
Diru-laguntzak ematerakoan jardueraren kalitatea eta interesa hartuko dira kontuan, besteak beste. Baita ere Udalak Euskara Biziberritzeko onartutako bigarren plangintza estrategikoaren helburuekin bat egitea, elkarte edo talde eska-tzailearen ibilbidea edo programaren oihartzuna.
Dirulaguntza jaso nahi dutenek IFKren kopia, aurreko urtean egindako jardueren memoria, jardueraren proiektu eta aurrekontu xehatua eta xedapenek ezarritako zerga-betebeharretan eta Gizarte Segurantzaren aurrean ordainketak egunean dituztela egiaztatzen dituzten agiriak aurkeztu behar dituzte.
Udalaren euskara arloak aztertuko ditu proiektuak eta Euskara Batzordeak diktamena egingo du eta batzordeburuak proposamena egingo dio Alkateari azkenik honek onar dezan. Eskabidea hilabeteko epean izapidetu eta erabakiko da eta, aipatutako epean eskabidearen ebazpenik ez badago, ukatu dela ulertuko da.
Euskara arloak 41.500 euro emango ditu egitasmo honetarako eta taldeek euren justifikazioa jarduera burutzeko epea amaitu eta hiru hilabete baino lehen egin behar dute. >I. Alberdi |
|
|
|
|
|
|
