 |
|
|
|
'Eguen musikalak' ostalaritzara aterako dituzte lehenbizikoz Gernika-Lumon
|
musika jendearengana hurbiltzeko lehen saioa apirilaren 24an egingo da .
Segundo Olaeta Musika Eskolak jarri du martxan esperientzia hau, herriko zenbait enpresarirekin adostuz.
|
|
|
Imanol Fradua
|
|
gernika-lumo. Segundo Olaeta Musika Eskolak eta Gernika-Lumoko ostalaritza sektoreak Eguen Musikalak izeneko ekimena udalerriko taberna eta bestelako aretoetara hurbilduko dute lehen aldiz. Honen bitartez musika kaleetara atera eta jendearengana hurbildu nahi da, bide batez herriko animazioa bultzatuz.
Eguen Musikalek herriko biztanleei aisialdirako beste aukera bat emateaz gain, musikariei ere euren lana kalera atera eta azaltzeko beste gune bat eskainiko diete. Beste alde batetik, ostalariei eurei ere diru sarrera aparteko bat lortzeko aukera ere emango die.
Sei ikuskizun daude aurreikusita, momentuz, eta apirilaren 24an hasi eta ekainaren 26rarte luzatuko dira, beti ostegunetan eta arratsaldeko 20:00etatik aurrera.
Lehenengo emanaldia apirilaren 24an eskainiko da Aterpe tabernan, jazz talde baten eskutik. Hurrengoa maiatzaren 8an izango da, Txiki-Parkean egingo den umeentzako kontzertu batekin. Hurrengo bi emanaldiak Segundo Olaeta Musika Eskolako Konbo Ganbara taldearen eskutik etorriko dira, lehena maiatzaren 22an Rugby tabernan eta bigarrena ekainaren 12an, Auzokoa kafetegian.
Azken aurreko emanaldia ekainaren 19an izango da, Pasealekuan, eta bertan Txanogorritxu Rock ikuskizuna eskainiko da. Hurrengo astean, 26an, aurtengoz adostutako azken agerraldia izango da, hain zuzen ere Auzokoa kafetegian jazz talde batekin.
Aukera zabalik Asteon aurkeztutako programan sei agerraldi aurreikusi dira, baina gehiago egiteko aukera dago. Ekain Ormaetxea Kultura zinegotziak jakinarazi duenez, "hasieran erdi guneko tabernetan antolatuko dira kontzertuak, baina gure asmoa ekimena GErnika-Lumoko auzo desberdinetako tabernetara ere zabaltzea da".
Horregatik, udalerriko beste tabernek ere ikuskizun hauek hartzeko eskaera egin dezakete, betiere leku baldintza aproposak betetzen badituzte. Interesa dutenek Segundo Olaeta Musika Eskolara deitu behar dute eskaria egiteko. |
|
|
|
|
|
|
