 |
|
|
|
Zirrikituetatik begira
|
|
Piratak
|
|
Pili Kaltzada
|
|
 |
laster jakingo dugu zehazki zer gertatu den Playa de Bakio eskifaiaren barruan, baina albistea ezagutzera eman eta protagonistek hitz egin bitarteko tarte luze hau gure irudimenak bete du. Senitarteko eta adiskideek besterik izango zuten buruan, jakina, baina ikusle hutsa garenontzat, garaiz kanpoko abenturaren traza guztiak hartu ditu honek. Pentsa. Liburuetatik ihes egindako istorioa balitz bezala adi-adi eduki gaitu, jazoerak benetan bizi izan dituztenentzat ahazteko moduko historia izan bada ere.
Han urruti, mapetan kokatzeak lanak emango lizkigukeen Somalia hartan, piratek eraso egin diote itsasontziari. Itsasertzetik 250 miliara zegoen atun-ontzia, nazioarteko uretan. Afal ordua zen bertan, eta halakoan, lau pirata on-tzira sartu eta preso hartu dituzte bertakoak, bahitu. Berehala argitu zuten ekintzaren zioa: "Dirua nahi dugu", esan zuten irratiz. Lotarako orduan, errealitateak emandako argumentu honen fantasiaren mailara iristen ez diren hamaika istorio kontatzea egokitu ohi zait niri gauero-gauero. Piratak atsegin dituzte etxeko txikiek, gu geuk txikitan atsegin genituen bezainbeste.
Garaiz kanpoko gertakariak dirudite hauek, baina nazioarteko komertzioan diharduen adiskide batek argitu dit eguneko ogi direla itsasoan piraten erasoaldiak. Munduko ia bazter guztietan dihardutela, eta garraio-sareak kontrola-tzen dituzten konpainientzako buruhauste itzel direla. Bandera beltzik ez, ezta egur-zango edo loro hiztunik. Horrelakoak ez dira usu izaten gaur egungo piraten artean. Orain nazioarteko legeek sortutako jurisdikzio-hutsartetan aritzen dira, eta urrezko txanponen ordez, auskalo nongo paradisu fiskaletan erraz garbitu daitezkeen diru-funtsak eskatzen dituzte ordainetan. |
|
|
|
|
|
|
