 |
|
|
|
Etorkin gazteak euskarara erakartzeko plana sinatu da
|
|
Gernika-Lumoko Udalak eta AEK-k elkarlanean aurten bultzatuko dute egitasmoa.
|
gernika-lumo. Udalerriko etorkin gazteak euskarara hurreratzeko egitasmoa sinatu zuten atzo arratsaldean Gernika-Lumoko Udaleko arduradunek eta AEK erakundekoek. Erabilera sustatu eta hizkuntzaren etorkizuna berma-tzeko lanean jarraitzeko proposamenak, 2003ko apirilean abiarazitako Euskara Biziberritzeko Plan Estrategikoan du oinarri, eta orduz geroztik urtero finkatutako Kudeaketa Plan desberdinen bitartez.
Etorkinei zuzenduriko hainbat ekintza aintzat hartuko ditu egitasmoak urte honetan. Plana aurrera eramateko AEK Euskaraz Kooperatiba Elkartea elkarlanean arituko da Udalarekin, zeinek proiektua gauzatzeko behar diren azpiegitura eta baliabideak eskainiko dituen. Horien artean 12.000 euroko dirulaguntza ere izango da. AEK erakundeak Gernika-Lumora heldutako etorkin gazteak euskal mundura erakartzeko Plan Estrategiko berezia diseinatu eta abiatzeko ikerlana gauzatuko du.
Euskara Saileko zinegotzi Idoia Fernandezek adierazi duen moduan, "12 urtetik eta 24 urtera arteko etorkinak izango dira aztergai, hiru azpi-taldetan". Gainera, "AEK-k laguntza teknikoa eta metodologikoa eskainiko digu Plan Estrategikoa diseinatzeko". Hilean behin jasotako datuekin, txostena aurkeztuko dio Udaleko Euskara Zerbitzuari AEK-k. Besteak beste, etorkin heldu berriak artatzeko ibilbide programak, gazteei zuzenduriko berbalagun programak, motibazioa lantzeko jarduerak, gazteen hizkuntza gatazkak ematen diren guneak detektatu eta eurei egokitutako mikroplanen diseinuak eta konpromisoetan oinarrituriko hitzarmen bidezko ekintzak jarriko dira abian. >i.f. |
|
|
|
|
|
|
